小時候爸爸間唔中都會入廚，我哋都好期待佢入廚，因為每一次佢煮嘢食總會有啲驚喜，煮嘅都係我哋鍾意嘅嘢食！黑椒汁煎牛扒、炸子雞、炸雪糕、燒鵝……當然唔少得嘅係過時過節一定會食嘅茄汁蝦碌！爸爸整嘅茄汁蝦碌酸甜適中，加上彈牙嘅蝦肉、脆卜卜嘅蝦殼，真係成隻蝦都食晒！

昨日心血來潮，又想整一下茄汁蝦碌，煮咗咁多年今次改一改煮嘅方法，用上新鮮自家製嘅茄汁，唔知整出嚟嘅效果會係點㗎呢？

自家製嘅茄汁酸甜層次比較豐富，食到新鮮蕃茄嘅味道，加上新鮮嘅中蝦去整，又鮮味又惹味！整多啲茄汁放喺雪櫃，仲可以比小朋友點薯條食😍