今日係大年初一，我相信大家嘅Facebook都應該係俾啲賀年嘅訊息洗咗版㗎啦，咁我就特別啲出個東南亞食譜俾大家啦！

新加坡辣椒膏炒蟹，大約10年前左右帶嗰陣時只有一兩歲嘅阿女去新加坡嘅時候，喺聖淘沙嘅一間餐廳食到呢一道菜式，覺得超級好味！仲記得當年嘅蟹係用一隻兩斤幾嘅大肉蟹，兩個人根本冇可能食得晒。餐廳嗰度只係可以選擇chili Crab或者黑胡椒炒蟹，感覺上黑胡椒好似好辣咁，於是就揀咗睇落去冇咁辣嘅辣椒膏炒蟹。最後只係食剩少少，帶埋返酒店第二日做早餐！

辣椒膏炒蟹，雖然個名叫做辣椒膏炒蟹，但係其實得少少辣，多多甜！佢同黃咖喱炒蟹有一個共同嘅地方，就係有好多蛋！老公最鍾意用啲蛋汁來撈飯！

今日，突然心血來潮想食，雖然買唔到當年嘅兩斤幾大肉蟹，買來細細隻12両嘅細肉蟹過吓口癮都唔錯！

之前問新加坡嘅朋友辣椒膏炒蟹嘅主要材料，今次自己加加減減，製作一個樂思廚版本嘅辣椒膏炒蟹，我覺得好好味喎！而阿女居然都好鍾意，仲有幾日假放，好多海鮮檔都有開門，大家快啲去試吓！