乳酪鑊仔炒牛柳

鑊仔炒牛柳,甜甜酸酸非常好送飯嘅一道菜式!有時去茶餐廳唔知道食啲乜嘢好,就會點呢一道菜式。茶餐廳嘅鑊仔炒牛柳好好味,因為加咗梳打粉同埋鬆肉粉,炒出嚟嘅牛柳又鬆又滑,特別美味。

喺屋企整想健康啲,唔想落化學物去整松牛柳有咩方法呢?可以用生果酵素或者用乳酪!呢兩個方法都可以令到牛肉鬆軟多汁好好味!

鑊仔炒牛柳唔難煮,就係需要比較多嘅調味料,大家睇吓下面嘅食譜試吓整啦!

材料:牛柳350克、洋蔥半個(切件)、紅椒一個(切件)、乾蔥頭兩粒(一開四)、蔥段適量、蒜頭兩粒(拍扁)

牛柳醃料:乳酪一湯匙(用純乳酪比較好)、糖½茶匙、生抽1.5茶匙、水一湯匙、茄汁一茶匙、油一湯匙、鷹粟粉一茶匙

醬汁材料:清水100毫升、茄汁三湯匙、喼汁一湯匙、黑醋一茶匙、牛扒汁一湯匙、生抽一湯匙、老抽適量、鹽少許

其他:生粉水適量
步驟
1. 牛柳先用牛柳醃料醃最少兩小時
2. 在鍋中爆香兩粒蒜頭,加入牛柳炒香至六成熟,取出後備用
(我喜歡除掉所有的醬汁)
3. 洗乾淨炒鍋,加入少許油,爆香蔥頭、洋蔥、蔥白及紅椒至焦香
4. 注入醬汁材料煮一會兒,加入牛肉試一會,試味至合適
5. 加入青蔥段後注入適量的生份水收汁即可

發佈回覆

你的電郵地址並不會被公開。 必要欄位標記為 *