無激素銀杏百合鷓鴣湯

最近疫情非常嚴重,每天都收到大家的SOS短訊,關於消毒spray 仲有冇得訂、如何使用。好返嘅朋友就問我有冇啲湯水可以補下身,既然大家問到我就梗係要問下中醫朋友,用啲乜嘢嚟煲湯又好味又健脾潤肺呢?

中醫朋友回覆,可以用百合、海底椰、圓肉等等健脾益胃補肺嘅食材。至於肉類,用鷓鴣係唔錯!

我都記得以前小朋友病嘅時候成日都咳,仲要咳唔斷尾,我就會煲鷓鴣湯俾佢哋飲,細細隻嘅鷓鴣既清甜又有益。尋日有啲時間,去探望供應花膠俾我嘅食材供應商,順手問吓佢有冇無激素鷓鴣,原來佢都有賣(價錢當然比一般鷓鴣貴啦),馬上買來兩隻,再喺佢嗰度買埋其他優質嘅材料,今日就煲一煲湯試吓好唔好飲先!

用LC嚟煲湯,非常鎖水,煲咗大約兩個鐘頭有得飲啦!未落鹽試一試味,非常清甜!落埋鹽再試一試味,冇得頂!

材料:無激素鷓鴣兩隻、瘦肉$20、茨實兩湯匙、百合7-8條、淮山6-7條、白果30粒、核桃8粒、薑兩片、北海道瑤柱兩粒、蜜棗一粒、圓肉一湯匙
步驟
1. 無激素鷓鴣解凍後洗乾淨,一隻切開四件
2. 瘦肉洗乾淨切成正方形粒粒
3. 鷓鴣及瘦肉放在室溫水中,煮滾後取出洗乾淨(跑活水)
4. 先把白果洗乾淨後放進滾水中,煮2分鐘,取出白果,去殼及芯
5. 其他材料全部洗淨(包括白果),放進2500毫升的滾水中,以大火煮滾,再轉中小火煲兩小時,加入少許鹽調味即成。

發佈回覆

你的電郵地址並不會被公開。 必要欄位標記為 *