焗爐版叉燒

叉燒斬大嚿叉燒!由細到大都好鍾意食叉燒,細細個住喺舊區,街坊鄰里非常之熟悉,屋企樓下就有一間燒臘舖。嗰陣時同燒臘舖嘅斬叉燒叔叔好熟,每次佢都比最靚嘅叉燒我!而最好味嘅呢一定係第一刀既叉燒,肥肉爽口但不肥膩,但係唔係成日都買得到,要預早幾日同佢講留返先有。

後來燒臘舖結業之後,想食到最美味嘅叉燒就唯有自己整啦!要整到靚叉燒當然要買到靚嘅豬肉,要買到第一刀有兩個方法,一係你就同豬肉檔好熟佢留返俾你,一係就晨早流流八點未夠去街市買🤣

今次用現成嘅叉燒醬去做第一刀叉燒,再加少少調味料,適合要返工忙碌嘅大家。

材料:第一刀豬肉斤半、叉燒醬三湯匙(我係用九龍醬園的叉燒醬)、玫瑰露酒一茶匙、薑蓉1茶匙、糖少許、生抽一茶匙、蠔油一茶匙

其他:蜜糖適量
3. 1. 第一刀請肉檔幫忙切長條型(同佢地講整叉燒就會幫你切㗎啦)
2. 洗乾淨第一刀後用廚房紙盡量抹乾,加入所有醃料醃最少7小時,過夜更佳
3. 預熱焗爐190度,把第一刀及醬料放進焗盤內,在面層鋪上錫紙,入爐焗50分鐘
4. 取出焗盤,取去錫紙,把叉燒醬汁淋在叉燒上,調高焗爐溫度至200度,焗5分鐘
5. 反轉叉燒,再把叉燒醬汁淋在叉燒上,再焗5分鐘
6. 把蜜糖塗抹在叉燒上,焗3分鐘,反轉叉燒,再塗沒蜜糖再焗3分鐘
7. 目測叉燒顏色有點焦香則可以取出切件

發佈回覆

你的電郵地址並不會被公開。 必要欄位標記為 *