昆布汁煮茄子

由細到大我嘅腸胃都比較敏感,食錯少少嘢就會肚痾,然後就會頭暈同埋發冷🥲前兩日食咗一個叉燒飯,然後覺得開始唔妥,中午去咗七八次洗手間,然後夜晚開始發冷。第二日好少少,但係仍然都有肚瀉嘅症狀。

到咗今日,病情好返啲啦,由於想休息多啲,所以去咗一田買壽司俾小朋友食,經過蔬果嘅位置,見到有好靚嘅茄子,立刻買來一個,準備午餐時候煮嚟食!

病咗嘅時候我嘅身體會自己話我知需要食啲乜嘢,後尾Google睇返原來茄子有止瀉嘅功用,咁就啱晒我啦!

用上清清地嘅汁煮方法,加埋少少薑蓉刺激食慾,清清地食一餐、又快又有益!

材料:茄子一個
醬汁材料:日本醬油1.5湯匙、味醂三湯匙、料理酒兩湯匙、鰹魚汁三湯匙、清水100毫升、糖少許、昆布一小塊
其他:薑蓉少許、白芝麻(炒香)適量、蔥花少許
步驟:
1. 茄子洗乾淨後先去掉頭尾,然後以刀鎅上淺痕(會容易啲入味)
2. 把茄子切條狀,然後浸在鹽水中,以防止氧化
3. 加入少許油,燒熱炒鍋,把茄子皮的一邊放在炒鍋中,先煎香2至3分鐘,以保持漂亮的紫色
4. 兩三分鐘後,將茄子略炒
5. 按以下次序加入汁料:料理酒、味醂、日本豉油、糖、鰹魚汁、水、最後加入洗乾淨了的昆布
6. 蓋上蓋子煮大約3至5分鐘,直至茄子變林
7. 把茄子放在小碟中,在上面加上薑蓉、蔥花及白芝麻即可食用

發佈回覆

你的電郵地址並不會被公開。 必要欄位標記為 *