青檸蜜糖美極骨

8號風球前的一天,接小朋友放學之前打算去街市買定啲嘢打風嘅時候煮,去到街市發現人多到好似做節咁。豬肉檔嘅豬肉已經所剩無己,只剩下排骨同埋飛排。馬上買來$50飛排,留返第日打風嘅時候煮。

飛排一般都是用炆或者蒸嘅方法嚟煮,8號風球得閑啲,試吓用半煎炸嘅方法嚟煮,估唔到效果非常理想!飛排半煎炸完質地依然好好,外脆內軟。

加埋青檸蜜糖去煮,甜甜酸酸非常開胃!大家經過豬肉檔買到飛排嘅話,就不妨試吓整啦。

材料:飛排半斤、青檸一個、美極一茶匙、麵粉適量、蜜糖1.5湯匙、白芝麻少許(可省)、糖少許、老抽¼茶匙、麻油少許
步驟
1. 飛排洗乾淨,抹乾後切成麻雀大細
2. 加入美極、糖少許、老抽及麻油醃最少15分鐘,最好1小時以上
3. 加入麵粉飛排,直至排骨不黏手為足夠
4. 在炒鍋中燒熱油,加入飛排以半煎炸炸香
5. 取出飛排備用
在另一個炒鍋中加入蜜糖、少許生抽、青檸汁(逐少加入)及少許水,試味至合適,排骨回鍋,快炒使其沾上蜜糖青檸汁
加入已炒香的白芝麻拌勻即可

發佈留言

發佈留言必須填寫的電子郵件地址不會公開。 必填欄位標示為 *