晚飯後收到一位朋友仔嘅PM，問我可唔可以俾美極炒牛肉飯嘅食譜佢，因為明天想整比囡囡食！可惜嘅係我仲未寫😅，因為上次整嘅時候冇影到steps的相，本身諗住再煮嘅時候先影相，但係既然有人想要就今日寫咗先啦，啲相就再候補加入入去！

美極牛肉炒飯，其實係好容易整嘅，材料只係得幾樣嘢，再炒幾炒5分鐘就食得啦！大家睇住食譜先，遲吓再補相啦！

材料：牛肉60克、芥蘭或菜心莖部位置4-5條（切片）、鮮蝦4-6隻（先灼熟然後切粒）、雞蛋1隻、隔夜飯1.5 碗、蒜頭兩粒拍扁

調味料：美極1.5茶匙、糖少許、魚露少許

牛肉醃料1: 生抽半茶匙、蠔油少許

牛肉醃料2: 粟粉1/3茶匙、水1.5茶匙、油少許

其他：蔥花適量（可省）

步驟：

1. 牛肉買回來後，切成粒粒，先用醃料1醃15分鐘，再加入醃料2醃15分鐘

2. 在炒鍋中加入適量的油，然後爆香兩粒蒜頭，加入牛肉粒炒香至九成熟盛起。

3. 再同一個鍋，加入少許油，首先爆香菜心或芥蘭的莖部，然後加入一隻雞蛋炒香後切碎，加入隔夜飯炒勻

4. 牛肉回鍋與隔夜飯炒勻，加入調味料後試味至合適，然後加入蝦粒炒一會兒即可。