今日姐姐突然間要放假去送機，於是乎我就做咗一日全職媽媽🤣朝頭早起身煮早餐俾小朋友，然後忙着ball and chain 既新貨發佈，幫大家訂咗一大輪袋之後，就準備午餐，再送去學校俾小朋友😍然後去買餸準備今晚嘅晚餐。
已經計劃好晒，今晚要食乜嘢，買咗牛坑腩、薯仔、雞翼同埋黃咖喱醬，跟住返屋企準備煮嘢食！
點知，整整吓嘅時候發現開唔到支黃咖喱醬😅真係用咗15分鐘都開唔到，仲要用盡晒所有方法：橡筋、廚房手套、浸熱水、保鮮紙……當開到好氣餒嘅時候，喺WhatsApp魔鬼群組講兩句，點知有朋友仔同我講可以試吓用刀仔撬，神奇嘅事發生，一撬撬開咗，群組朋友仔咖喱有啲辦法！就係靠佢開到之王咖喱醬，今晚有咖喱食😂
本身開唔到支黃咖喱醬，加咗啲柱侯醬落去牛腩度，原來加埋黃咖喱醬一齊煮好好味喎！
材料：牛坑腩一斤（切件）、洋蔥半個（切件）、蒜頭四至五粒、薑片五至六片、蔥頭兩粒（一開四）、薯仔一個（去皮後切件，放在水中，以防變色）
調味料：紹興酒兩瓶蓋、黃咖喱醬兩湯匙、柱侯醬一茶匙、蠔油一茶匙、生抽兩湯匙、冰糖少許、水一碗（約250毫升）
步驟
牛坑腩買回來後洗乾淨，以跑回水的方法處理，然後洗淨，抹乾水備用
在平底鍋中加入適量的油，先爆香薯仔，然後取出
在同一個平底鑊中加入薑片、蔥頭、洋蔥炒香後加入牛腩爆香
順序加入調味料煮滾
把牛腩連同調味料放在高速煲中，煮15分鐘，排氣後開蓋，加入薯仔再炆煮3分鐘即可