有朋友問點解我咁鍾意煮嘢食呢？其實呢個係來自我父母嘅遺傳！我爸爸細個任職酒店嘅工程師，雖然佢係一個工程師，但係成日都落去酒店餐廳嗰度睇廚師點樣煮嘢食！同佢哋熟咗之後仲成日可以攞啲雞湯返屋企自己做實驗，我記得佢同我講：「呢啲雞湯就係用嚟整魚翅、佛跳牆等等嗰啲雞湯嚟㗎！」，酒店做嘅雞湯味道一向喺記憶入邊，婆濃嘅雞湯，金黃色嘅顏色，飲一口係味蕾嘅享受！

回憶中嘅雞湯真係好好味，但係之後喺好多地方飲過嘅雞湯都飲唔番呢種嘅味道，直至昨天去到JW Marriott 食自助餐，咁啱叫咗一碗水餃配雞湯，熟悉嘅味道，超好味嘅雞湯！即刻問吓廚師點樣整，當然佢哋唔會教晒我點樣整啦，都係講吓材料咁樣：「你要新鮮雞一隻、好多雞殼、金華火腿等等，記得炒香佢啊！」

靈機一觸，咁多年嘅雞湯原來就係差「炒一炒佢！」，食完飯後馬上去咗街市度買隻雞返屋企整雞湯，經過炒一炒材料煲出嚟嘅雞湯，果然非常好味！大家記得要收藏呢個食譜呀！