話說老公係黃豆嘅fans，鮮竹卷啦、炆豆卜啦、腐皮卷啦……樣樣都鍾意！尋日心血來潮話想食鮮竹卷，咁二十四孝嘅我去完覆診之後途經超級市場，就買來日本嘅菇菇，無激素嘅雞脾肉同埋2張腐皮，求其整個鮮竹卷俾佢先！

用上日本調味料做嘅鮮竹卷，同大家平時食嘅味道有啲唔一樣，多咗少少甜味、多咗少少鮮味。鮮竹卷嘅製作不難，大家就趁星期六日有時間試吓整啦。