因為隻手嘅緣故，所以好耐都冇食過蝦！見到情況好咗少少非常掛住廣式大蝦雲吞，本身諗住整大蝦雲吞，點知姐姐又買錯咗上海餃子雲吞皮皮😅，既然其他材料都準備晒，咁就照整大蝦豬肉餃子啦！加咗大地魚粉嘅餡料，味道獨特，今次雖然用咗冷藏嘅蝦，但係亦都好彈牙爽口，唔錯唔錯！最後整咗20幾隻，一次過比屋企人食晒🤭
材料：新鮮豬上肉$30、冷藏蝦（我用thai 嗰個牌子）200克、上海餃子雲吞皮適量
豬肉醃料：胡椒粉1/4茶匙、鹽1/4茶匙、糖半茶匙、生抽兩茶匙、大地魚粉一茶匙、魚露少許、蛋白一隻
餃子湯底：雞湯1公升、大地魚粉兩茶匙、鹽少許、糖少許、韭黃適量（切段）
步驟：
豬肉買回來後洗淨放在室溫水中最少30分鐘，然後洗淨抹乾
冷凍蝦用流水的方式處理，解凍後浸在冰水中，然後加入少許鹽，浸10分鐘，然後抹乾（要抹到好乾！）如果蝦太大的話需要切開
把豬肉放在砧板上分開肥肉及瘦肉的部份，分別剁碎（呈小粒狀即可以不需剁得太細）
把瘦豬肉及肥豬肉混合（驚肥嘅話落少啲肥豬肉，不過一定要落先好食㗎），然後加入醃肉調味料（蛋白除外）先醃15分鐘，加入已抹乾的蝦仁，然後加入蛋白，再醃15分鐘
在餃子皮中放入一隻蝦（或者半隻如果蝦太大的話）及一茶匙的肉
把餃子皮對半包好成三角形壓實，然後把三角形下端的兩個角向上接即成餃子的形狀
把餃子放在滾水中煮大約3至5分鐘，直至餃子浮起
製作湯底
把湯底所有材料放進（韭黃除外）試味直至合適，然後加入韭黃菜煮一會兒
把湯底注入煮好的餃子即可❤️