過咗中秋節又係食臘味嘅時候！記得細個嘅時候，中秋節之後天氣就開始轉涼，開始有一啲秋天嘅味道，嗰陣時最鍾意同屋企人食炒栗子、食臘味糯米飯、食蛇羹。近年天氣反常，秋天仲係好鬼熱！完全冇秋涼嘅感覺，不過按照細個嘅習俗，中秋節之後都係會食吓臘味嘅。
昨天晚上，喺屋企煲咗一煲臘味蝦乾煲仔飯，一路煲成個廳都好香，最重要嘅係一煲到尾，烚碟菜就搞掂一餐，簡單又好味呀！
材料：鵝肝腸兩條、臘腸一條、生曬紅蝦乾五隻、米一杯、蔥花適量、雞湯半杯、浸蝦水半杯
煲仔飯豉油材料：生抽兩湯匙、老抽半茶匙、玫瑰露酒一瓶蓋、糖半茶匙、水兩至三湯匙
步驟
蝦乾洗乾淨之後放喺室溫水浸10分，取出後抹乾
鵝肝腸及臘腸洗乾淨後抹乾切片
平底鑊中加少量油，爆香蝦乾（一定要爆開咗啲飯煮出嚟先夠香啊）
砂鍋中加入一杯米、雞湯半杯及浸蝦水半杯
以中火先煮滾，然後轉最少火煮4分鐘
4分鐘後打開鍋蓋，把臘腸及蝦乾放進，再蓋上蓋子，以慢火煮7分鐘，然後焗5分鐘
灑上適量蔥花，再焗2分鐘即可
煲仔飯豉油放在小鍋中煮滾即可