去茶餐廳食飯嘅時候唔係A餐就係B餐，經常都會有嘅就係黑椒汁豬扒飯、黑椒汁豬扒意粉、黑椒汁扒飯或者配薯菜……黑椒汁可說是香港人一定識嘅其中一款醬汁。
黑椒汁對於我嚟講仲係一個童年回憶，記得小時候爸爸好鍾意煮返兩味，其中一道拿手菜式就係黑椒汁牛扒❤️當年喺酒店做嘢嘅佢，雖然唔係廚師，但係成日去餐廳睇廚師點樣整牛扒，然後喺屋企自己研究醬汁，爸爸整嘅黑椒汁比較辣，我家小朋友比較喜歡食港式嘅味道，於是我就跟佢嘅研究精神，去我覺得好食嘅茶餐廳試多幾次，再加入自己覺得配搭到嘅調味料，整咗一個獨一無二嘅鮮菇黑椒汁出嚟。
由於加咗鮮菇，令到黑椒汁多咗一種獨特嘅味道，無論係大朋友或者小朋友都好喜歡！
材料：新鮮雞髀四隻（起骨）
雞扒醃料：鹽半茶匙
黑椒汁材料：蒜頭三粒（切粒）、蔥頭三粒（切粒）、黑椒碎1/3茶匙（可以按喜好加減）、茄汁一湯匙、糖2-3茶匙、喼汁兩茶匙、美極鮮醬油2茶匙、生抽一茶匙、老抽兩茶匙、雞湯100毫升、鹽少許、水100毫升、中筋麵粉一茶匙、滾油適量、新鮮冬菇或者蘑菇四至五隻（切片）
步驟
雞髀買回後起骨（可以請雞檔代勞）洗乾淨後抹乾，在雞肉的位置𠝹幾刀，然後在雞皮的位置用叉子差上很多小洞，以半茶匙的鹽醃最少兩小時備用
不銹鋼鍋燒熱後加入適量的油，放入雞扒（雞皮向下）然後轉小火先煎7分鐘，期間可以用鑊鏟按壓雞扒，雞扒煎出嚟就更加靚
7分鐘後把雞扒反轉，然後再煎6至7分鐘
黑椒汁製作：在平底鑊中加入適量的兩湯匙的油，燒滾後加入中筋麵粉中煮成麵糊
在同一個平底鑊，加入一湯匙左右的油，爆香鮮冬菇片取出後備用
再平底鑊加入適量的油，加入蒜頭及蔥頭以中小火慢慢爆香，加入茄汁爆香，然後把其餘調味料放進煮滾後試味
味道合適後，逐少加入麵糊慢火煮一會兒再加入菇塊即成黑椒汁
在烹調雞扒前煮煮好白飯，把白飯放在碟上，側邊放上煮好的雞扒，然後加入黑椒汁即可