上次去清邁學藝之後，一直都想試吓喺屋企自己整椰漿，然後製作紅咖喱，但忙住玩同埋做嘢嘅我，上個禮拜一直都冇時間，琴日喺日本返嚟之後，今朝一早起身馬上行動！

用新鮮椰漿做嘅紅咖喱，比起用盒裝做出嚟嘅紅咖喱更易煮出靚靚嘅椰油、椰味更加香濃，如果買唔到椰漿，但係屋企有攪拌機，不妨試一試，而且一個椰子，椰汁可以用嚟整雞湯、椰子肉可以用嚟整椰漿同埋椰絲，一個多用$35買一個返嚟玩吓，超級抵😃

另外，俾少少冷知識大家，喺超級市場或者泰國買到一盒盒嗰啲，我哋全部當佢係椰漿，質地比較杰，用嚟煮泰菜嘅時候比較容易煮出椰油，但係就比較肥同埋膩。咖喱嘅時候其實係要加一啲椰奶，椰奶就係椰漿加水，如果買盒裝嘅椰漿就需要加水，水嘅份量係一比一，椰奶可以令到咖喱帶有椰香味但係冇咁膩，自家製製作嘅話就睇吓食譜啦！