細個時候喜歡幫襯車仔檔買咖喱魚蛋、水魷魚、腸仔😍😍😍長大後，車仔檔好難搵，街鋪食滋味也不如此，加上覺得街舖做嘅冇自己屋企整咁衛生，既然係咁不如就自己發魷魚、整豬皮、整魚蛋、整咖喱四寶！
今日就同大家分享一下點樣發水魷魚😆
水魷魚並唔係新鮮嘅魷魚，其實係用乾魷魚同鹼水透過化學嘅作用，發脹咗成為粉紅色大大隻嘅水魷魚。
水魷魚並不難做，係要有少少耐性、俾少少時間，自己就可以發到又乾淨又大隻嘅水魷魚啦！
材料：大隻魷魚乾一斤（大約5-6隻一斤）
第二次浸發：食水10L、食用鹼水200毫升（如果發少啲嘅話就跟比例減水份同埋鹼水）
第一次、第三次及4次浸發清水10L
步驟：
大隻魷魚乾洗淨，先以10L水浸2小時至軟身（視乎魷魚的厚度，如有需要的話可以浸耐d)
將水倒掉，魷魚取出，清洗一下
在容器中加入清水10L及200 ml 食用鹼水攪拌勻循（記得要充分攪拌勻循），把魷魚放進，把容器放在雪櫃中，發8-10小時（厚啲嘅話就發耐啲）
10小時後把魷魚取出，去掉軟骨及外皮，然後注入10L清水，將重新放進浸發12小時，然後再換水再浸發12小時
取出洗乾淨切片即可使用
大嘅魷魚，一般都係浸36小時左右，記得要用一個大嘅容器同埋每12個鐘換咗一次啊