Fusion 彙整 - Daphne 樂思廚

港式羅宋湯

dralanlam — Tue, 24 Mar 2026 14:27:21 +0000

每次去茶餐廳食午餐，都會有兩款湯可以揀：羅宋湯同埋忌廉湯，每一次都會選羅宋湯，因為感覺好似健康一啲！多啲菜，又冇忌廉湯咁飽肚。茶餐廳嘅羅宋湯一向比較辣，屋企有老人家同小朋友食飯，自己整可以control羅宋湯嘅酸辣度，鍾意酸啲可以加多啲茄膏、鍾意辣啲可以加多啲指天椒，悉隨尊便，羅宋湯就咁飲又得、用嚟整通粉都可以，一家大細都喜歡，有菜又有肉

材料：牛腩半斤、椰菜一個、甘筍一條（今日唔記得咗買冇落到）、蕃茄六個、茄膏五湯匙、指天椒兩條（今日走辣冇落到）、西芹兩至三條、蒜頭四至五粒，水2公升、香葉6塊、青檸兩個（取汁用）

步驟：
1.牛腩買回來後洗乾淨，以跑污水的方式煮滾，然後洗乾淨，切件備用
2.洋蔥、甘筍、蕃茄及西芹全部去皮切粒
在鍋中加入適量的油，先爆香牛腩

3. 加入洋蔥及蒜頭在側邊爆香，然後加入甘筍、指天
椒及西芹爆香後加入茄膏略炒

4.加入2公升的水煮滾後，加入香葉，蓋上蓋子以中小火煮1小時15分鐘，打開蓋子，再用大火煮10分鐘
加入適量鹽、青檸汁、糖及黑胡椒調味即可

這篇文章港式羅宋湯最早出現於 Daphne 樂思廚。

蕃茄醬漢堡扒

dralanlam — Fri, 13 Mar 2026 09:42:03 +0000

呢一個係為自己寫嘅食譜，為咗記錄低呢個好好味嘅漢堡扒整法，等自己再想煮嘅時候容易搵得到嘅食譜

話說屋企嘅小朋友好鍾意食漢堡扒，喺市面買嘅漢堡扒，唔知用乜嘢牛肉，通常又係急凍嘅感覺唔係好新鮮，所以就自己整啦！自己整嘅漢堡扒可以選擇用嘅材料，即日整即日食，鮮嫩多汁

漢堡扒材料：免治牛肉100-220克、免治豬肉200至220克、洋蔥半個、雞蛋一隻、麵包糠三湯匙、牛奶兩湯匙

漢堡扒調味料：紅椒粉1/3茶匙、鹽1/4茶匙、黑椒碎少許、無添加菇粉少許

醬汁材料：蕃茄兩個（1.5個切粒、半個切薄片）、蔥頭兩粒（切粒）、茄汁兩湯匙、水200毫升、喼汁適量、糖適量、紅椒粉1/3茶匙、生粉水少許

其他（可省）：車厘茄幾個（切粒）、淡奶少許、芝士碎適量

步驟（漢堡扒）
1. 洋蔥以少許油用慢火爆香直至軟身，放涼備用

2.大碗中放入所有漢堡扒材料及漢堡扒調味，順時針方向攪勻及混合，直至有黏性

看得到黏性嗎？

3.然後平均把漢堡扒分成六至七件（100克一件左右）
兩隻手帶上手套，取出漢堡扒，然後左右手交替撻最少20次，把漢堡扒造成橢圓形，放在已鋪上保鮮紙的碟上

4.在漢堡扒的中間弄一個小洞（令到漢堡扒比較容易熟）
5.把弄好的漢堡扒放在冰格雪最少15分鐘

步驟（醬汁製作）
1.在鍋中加入少許油，爆香紅蔥頭，然後加入蕃茄粒爆香，加水及調味料煮滾，蓋上蓋子以慢火煮五至6分鐘，然後試味
2.加入蕃茄片，再煮2至3分鐘
3.然後加入適量的生粉水，直至喜歡的稀杰度

漢堡扒組裝
1.在冰格取出漢堡扒，然後在平底鍋中加入適量的油，先以大火2分鐘煎香漢堡扒一邊，然後轉另外一邊以大火再煎香2分鐘
2.蓋上蓋子，以中慢火再煎5分鐘

3.在小碗中加入蕃茄醬醬汁，然後放進漢堡扒，最後加入芝士
4.放在氣炸鍋中以200度焗4分鐘，直至芝士溶掉
按喜好加入適量淡奶口感更佳

Reminder：可以一次過整多啲漢堡扒，然後放喺冰格嗰度，要用之前3小時放返喺雪櫃嗰度回溫，咁就好方便啦

這篇文章蕃茄醬漢堡扒最早出現於 Daphne 樂思廚。

黃咖喱蜜汁鵪鶉髀

dralanlam — Sat, 20 Sep 2025 14:28:13 +0000

收到好多PM問我鵪鶉髀要點樣整，今日終於有啲時間寫埋呢個食譜俾大家啦！非常簡單嘅食譜，簡簡單單醃咗啲鵪鶉髀，然後放落氣炸鍋度炸一陣就食得，冇氣炸鍋嘅朋友亦都可以煎熟佢焗熟佢都可以！鵪鶉髀雖然細細隻，但係肉質非常鮮嫩，有小朋友嘅屋企可以買俾小朋友煲粥食，大朋友一個人可以食到一盒皮脆肉嫩，最緊要係無激素，食得放心又開心！

材料：無激素鵪鶉髀一盒八隻
鵪鶉髀醃料：蠔油一茶匙、生抽一茶匙、糖三份一茶匙、黃咖喱粉少許、老抽少許、生油適量
其他：蜜糖適量

步驟：
1.無激素鵪鶉髀先放在雪櫃一晚解凍，解凍後取出洗淨然後抹乾
2.把鵪鶉髀醃料放在鵪鶉髀中，醃最少30分鐘，醃耐啲入味啲

3. 氣炸鍋上放置一張牛油紙，把鵪鶉髀放在氣炸鍋中，以180度氣炸8分鐘，然後反轉再氣炸3分鐘
4.最後加入蜜糖，以180度氣炸1至2分鐘即可
5.取出鵪鶉髀放在碟中，然後小心地拿出牛油紙，把醬汁也倒在鵪鶉髀側邊即成

這篇文章黃咖喱蜜汁鵪鶉髀最早出現於 Daphne 樂思廚。

超級鮮味龍蝦包

dralanlam — Mon, 25 Aug 2025 10:45:22 +0000

細佬對煮食嘅興趣日益濃厚，不過繼續都係鍾意煮西餐！上星期喺台灣返嚟之後忙着出貨，冇時間煮飯，細佬於是拍晒心口咁同我講：「晚餐就等我嚟啦！」，仲話要整新鮮嘅龍蝦包，自已去買材料，然後自己整。平時佢睇好多YouTube同埋食譜，然後就改良一下做出自己喜歡嘅味道。今次龍蝦包嘅醬汁加咗奶粉，帶有淡淡嘅奶香味，步驟嚟講唔算複雜，加上用新鮮嘅龍蝦去做非常鮮味，喜歡食龍蝦嘅朋友仔不妨試吓整啦。

材料：新鮮龍蝦一隻、排包一包、

醬汁材料：無鹽牛油40克（室溫放軟然後切細粒）、大約一湯匙全脂奶粉、½湯匙檸檬汁、少許檸檬皮（切絲）110克沙律醬

其他：芫荽及蔥花少許（裝飾用，可省）

步驟：
新鮮龍蝦買回來後洗乾淨，用筷子放血，然後放在滾水中煮15分鐘後盛起放在冰水中，放涼後把龍蝦肉取出然後切大粒

好好肉

切粒

2. 30克無鹽牛油放在平底鑊中加熱，然後調校最細火，把奶粉慢慢放進，直至成奶油啡色
3. 把剩餘10克的無鹽牛油放在洗乾淨的平底鑊中，煎香龍蝦粒直至香氣四溢
4. 把龍蝦粒、煮好了的奶油啡色，無鹽牛油、沙律醬、檸檬汁、檸檬皮及少許鹽在碗中攪拌勻循，試味至合適
5. 排包切開，兩邊塗上牛油，然後煎香

6. 把調好味的龍蝦粒放在排包中間，最後加入少許芫荽及蔥花點綴即可

這篇文章超級鮮味龍蝦包最早出現於 Daphne 樂思廚。

南乳黃咖喱雞下髀

dralanlam — Sun, 11 May 2025 06:17:39 +0000

祝大家母親節快樂！母親節好多人都會出街食，我自己好少喺過節嘅正日出街食，因為唔想逼人，最好都係喺屋企簡簡單單同屋企人食飯慶祝吓。南乳黃咖喱雞下髀，用上泰國買嘅黃咖喱粉加上香港製造嘅南乳味道會點樣呢？阿女話好好味，簡簡單單用氣炸鍋嚟整，唔使開鑊油去炸，外脆內軟，不錯也。

材料：雞下髀六隻
雞肉醃料：鹽少許、黃咖喱粉1/3茶匙、孜然粉¼茶匙、生抽1茶匙、糖½茶匙、南乳一茶匙、蠔油少許、麵粉適量

其他：芝麻適量（可省）

步驟：
雞下髀先用鹽少許醃最少兩小時，然後按照圖示切開蘑菇狀備用

就係咁樣切開成為蘑菇狀

把雞肉醃料加入雞下髀，先醃製最少15分鐘
把一張牛油紙放進氣炸鍋的底部，然後加入雞下髀，以180度溫度先焗15分鐘，然後調高溫度至200度再焗5至6分鐘

最後灑上以烘焙的芝麻即可
想容易啲食可以喺骨嘅位置包一張錫紙

這篇文章南乳黃咖喱雞下髀最早出現於 Daphne 樂思廚。

金不換三杯韓國桶蠔

dralanlam — Fri, 08 Nov 2024 09:48:51 +0000

突然間好想食三杯醬汁，又好想食好蠔喺街市買嚟一桶韓國蠔，移除咗最硬嘅位置，食落去啖啖肉，正！今次用咗一位朋友嘅方法處理啲桶蠔，減少一路煮一路出水嘅機會，大家快啲睇吓食譜要點樣整啦。

材料：韓國桶蠔一桶、薑四片、金不換一包（取葉用，洗淨）、紅蔥頭三至四粒（一粒切開四件）、蒜頭6-8粒（輕拍）、指天椒片適量、蔥適量（切段）

三杯醬汁材料：兩湯匙生抽、兩湯匙麻油、兩湯匙米酒、老抽少許、糖及鹽少許、水2 湯匙

步驟
韓國蠔在桶中取出，先在水喉水中沖洗一會兒，然後加入一茶匙的食鹽均勻輕輕地撈勻，至於室溫中大約5分鐘，然後洗乾淨，重複兩次，然後把蠔浸在水中約5分鐘，再洗淨，把蠔放在滾水中灼10多秒，然後取出
取出後移除中間硬嘅位置，然後用叉在蠔肉叉上小孔，再將蠔肉用筲箕瀝乾一陣
用廚紙輕輕抹乾蠔身，然後拍上生粉

在炒鍋中加入適量的油，把韓國蠔放進，以中小火慢慢煎香至兩邊焦黃後盛起備用

在同一炒鍋中爆香蒜頭、薑、蔥白，要一啲耐性慢慢爆香才可以

加入韓國蠔及三杯醬汁材料煮滾，然後加入金不換葉，蓋上蓋中小火煮2分鐘

如果想好似啫啫既食法，喺煎蠔之前先將瓦鍋放喺焗爐入邊二200度預熱10分鐘

預熱後瓦鍋取出，將剩餘嘅金不換放喺煲底，再加入生蠔及其他配料及醬汁材料，蓋子煮1分鐘左右
喜歡濃稠醬汁嘅朋友可以適量加入生粉水

這篇文章金不換三杯韓國桶蠔最早出現於 Daphne 樂思廚。

韓國蠔櫻花蝦釜飯

dralanlam — Sun, 20 Oct 2024 12:35:11 +0000

相熟嘅老闆娘送咗一桶韓國蠔俾我，佢話韓國蠔比起美國嘅蠔更爽更香，從來都冇試過用韓國蠔煮嘢食，今日就試吓啦！想保留豪嘅鮮味，用嚟整釜飯就最適合不過，配上珍珠米嚟煮，帶少少日本嘅風味，菜式並不難煮，宴客嘅時候拎出嚟，應該大家都好喜歡。

材料：韓國蠔一桶（約八至九隻）、珍珠米1.5杯、蔥頭兩粒（切片）、蔥花適量、櫻花蝦兩湯匙（放在飯面上用）、油1.5茶匙

醬汁材料：味醂兩茶匙、清酒兩茶匙、日本豉油五茶匙、糖半茶匙、昆布一塊、櫻花蝦兩至三湯匙（煮飯用）

步驟
韓國蠔在桶中取出，先在水喉水中沖洗一會兒，然後加入一茶匙的食鹽均勻輕輕地撈勻，至於室溫中大約5分鐘，然後洗乾淨，重複兩次，然後把蠔浸在水中約5分鐘，再洗淨即可

在平底鍋中加入少許油先爆香蔥頭，然後加入韓國蠔每邊煎1分鐘，加入醬汁材料煮1分鐘，然後把蠔夾起

加入昆布及櫻花蝦煮2至3分鐘，即成蠔汁
珍珠米洗乾淨後加入1.5杯蠔汁（如果蠔汁不夠的話，則加入適量的水份，水份及蠔汁加埋要有1.5杯）
珍珠米及蠔汁放在陶鍋中，先以中火煮滾
直至冒出魚眼泡泡，蓋上蓋子轉小火煮12分鐘
12分鐘後打開蓋，把蠔放在飯的上面，然後再煮4分鐘

關火再焗4分鐘，打開蓋子，然後加入蔥花及櫻花蝦即可

這篇文章韓國蠔櫻花蝦釜飯最早出現於 Daphne 樂思廚。

瑪莎曼咖喱避風塘瀨尿蝦

dralanlam — Tue, 30 Jul 2024 14:22:54 +0000

海鮮檔老闆娘今日送咗幾隻瀨尿蝦俾我，本身諗住烚熟佢就食，但係突然間又想食啲邪惡嘅嘢喎，最邪惡嘅做法梗係鮮榨香佢然後整椒鹽啦！點知屋企冇晒椒鹽又冇晒五香粉，左搵右搵，後尾搵到一包未開封嘅瑪莎曼咖喱粉，心想：「加落去應該都唔錯」，果然脆卜卜又帶啲特別嘅咖喱味！想食特別味道嘅瀨尿蝦，可以試吓整

材料：瀨尿蝦五隻（當然可以買多啲啦不過老闆娘淨係送咗五隻俾我，所以今日只用五隻）、蒜頭八粒（切粒）、蔥花適量、瑪莎曼咖喱粉1/4茶匙、鹽1/3茶匙、指天椒適量、油適量、糖少許

步驟：
1. 瀨尿蝦買回來後先放在冰格雪最少半小時，直至瀨尿蝦雪暈
2. 剪去瀨尿蝦的腳及鉗
3. 然後在瀨尿蝦的身淺淺地切開幾刀（以免油炸的時候變攣），然後抹乾

步驟：
1. 瀨尿蝦買回來後先放在冰格雪最少半小時，直至瀨尿蝦雪暈
2. 剪去瀨尿蝦的腳及鉗
3. 然後在瀨尿蝦的身淺淺地切開幾刀（以免油炸的時候變攣），然後抹乾
4. 燒熱油，放入瀨尿蝦，如果油彈得太厲害，可以先蓋上蓋子，炸香瀨尿蝦可取出備用

5. 把滾油倒走，留一點油在鑊中，爆香蒜頭粒及指天椒片
6. 加入咖喱粉、鹽及糖炒香後，加入瀨尿蝦爆香，然後加入蔥花炒一會兒即可

這篇文章瑪莎曼咖喱避風塘瀨尿蝦最早出現於 Daphne 樂思廚。

土匪炸單骨雞翼

dralanlam — Mon, 24 Jun 2024 13:03:13 +0000

細佬從韓國回來後好想食我整嘅炸雞翼，阿女亦都好耐冇食過我整嘅嘢食！今日就如佢哋所願整單骨雞翼啦每次整單骨雞翼都會爭住食唔夠食，可惜嘅係屋企只得返12隻雞翼，整出嚟只有24件，小朋友爭下爭吓好快食晒！我自己只食到三件今次嘅雞翼，用上左土匪味道嘅孜然粉，經過油炸之後，更香更好味，大家快啲一齊睇吓點樣做啦！

材料：雞中翼12隻（沿骨用鉸剪剪開）
雞翼醃料：孜然粉1/3茶匙、紹興酒一瓶蓋、黃薑粉¼茶匙、甜椒粉1/3茶匙、蠔油一茶匙、生抽一茶匙、糖¼茶匙、生油少許，麵粉適量、鹽1/3茶匙、黑胡椒少許（可省）
其他材料：高煙點食油適量

步驟：
1. 雞中翼解凍後，用廚房鉸剪沿着雞翼骨把雞翼一開為二，然後以醃料中的鹽，醃雞翼最少15分鐘

2. 加入其他雞翼醃料，醃最少30分鐘，醃上幾小時後味道更入味

3. 在雞翼中加入適量的麵粉，直至黏手的狀態

4. 燒熱一鑊油，把雞翼放進，以中火慢慢炸熟，需時大約5至6分鐘

5. 把雞翼盛起

6. 調高油溫，然後把雞翼再放進，酥炸直至香脆即可
7. 吃可以灑上少許的孜然粉，更添美味

這篇文章土匪炸單骨雞翼最早出現於 Daphne 樂思廚。

椰子椰青雞

dralanlam — Mon, 27 May 2024 12:40:26 +0000

小朋友考試季節，實在太忙啦！買咗一個椰子返嚟本身諗住煲椰子雞湯嘅，之後冇時間煲有雞喺度又有椰子喺度咁整啲咩好呢？街市買嘅椰子欠缺甜味，想府中一點甜嘅話就要加啲椰青落去，臨時臨急買唔到新鮮嘅椰青都唔緊要，就用盒裝嘅椰青水啦！邊個牌子都冇乜所謂，總之係買100%純椰青水冇糖分嘅就可以啦！擺半隻雞入去焗一陣就有得食，非常方便又好味！

材料：鮮雞半隻、椰青水400毫升、新鮮椰子一個

步驟：
1. 鮮雞買回來後斬件，以1.5茶匙的鹽醃最少30分鐘
2. 新鮮椰子請檔主劈開，取出椰水及分開椰肉
3. 椰子水用篩過濾
4. 取1/4椰子的椰子肉，切成條備用
5. 在鍋中加入新鮮椰子水及椰青水煮滾後加入椰子肉，中火煮5分鐘

6. 加入雞件（如果雞件喺雪櫃攞出嚟，要先回溫至室溫），猛火煮滾
7. 蓋上蓋子熄火焗20分鐘

8. 20分鐘後檢查雞肉是否全熟

9. 撇去多餘的油分（真係好多油㗎，要仔細撇乾淨）
10. 鹽都唔使落！超好味

PS 由於呢個菜式冇乜調味料，所以記得用新鮮雞先好食㗎！用冰鮮雞會有雪味唔好食

這篇文章椰子椰青雞最早出現於 Daphne 樂思廚。