麵鋪牛五寶

dralanlam — Sun, 26 Apr 2026 05:40:03 +0000

屋企入邊嘅青少年都鍾意食牛肉，阿女喜歡食紅燒牛肉麵、阿仔鍾意食菜心炒牛肉、無論是西式中式日式嘅牛，佢哋都喜歡，今次就整一個整一次可以食幾日嘅嘢比佢哋食！港式牛五寶，出去食加個麵簡簡單單嘅午餐，整一次有排食，滿足晒佢哋嘅願望。

材料：金錢展一個、牛筋一斤、牛坑腩一斤、金錢肚半斤、牛筋腩半斤、薑一大塊（拍扁）、蔥頭四粒、蒜頭四至五粒、白醋一湯匙

醬汁材料一：南乳1.5件、柱侯醬兩湯匙

醬汁材料二：蠔油一湯匙、豉油兩湯匙、老抽少許、冰糖兩湯匙、滷水包一個、果皮一塊（浸軟去囊）、水3 公升

步驟：
1. 所有牛肉材料洗淨，然後放在室溫水中，加入一湯匙的白醋煮滾，然後關火把材料倒出洗淨備用

一定要出水哦，好多污糟嘢的

2. 炒鍋洗乾淨後注入少量油，爆香薑、蔥頭及蒜頭，加入醬汁材料一爆香

3.加入所有牛肉爆香後取出

4.加入醬汁材料二煮滾
5. 把醬汁、牛展及牛筋放在高速煲中先煮20分鐘，試一試醬汁的味道，可以按照喜好加減柱侯醬、蠔油及生抽等等

6. 20分鐘後加入牛肚及牛坑腩，再炆煮15分鐘
最後加入牛筋腩，炆煮15分鐘
7. 如果想再豐富啲可以加入日本大根，方法係將大根去皮切片，等牛肉炆好之後放入去高速煲嗰度炆3分鐘就可以啦。
8.煮好的醬汁有啲肥，如果想健康啲嘅話可以將醬汁放放在雪櫃一晚，然後撇去白色的油脂即可

超好味！

這篇文章麵鋪牛五寶最早出現於 Daphne 樂思廚。

沙茶沙嗲牛肚

Daphne 樂思廚 — Thu, 16 Dec 2021 03:12:03 +0000

小時候家住油麻地舊區，附近有一家歷史悠久的茶樓-得如酒樓，當年間唔中會同家人幫襯。還記得樓下有3部入2蚊就可以玩既搖搖船，仲有一個入1蚊可以磅重既橙色磅重計。

拾級而上，就去到貼左紙皮地既酒樓。爸爸話：「以前d人會帶埋雀仔飲茶架！」，但細個幫襯時，已經無雀仔啦！

去到酒樓，一定會點以下既點心：蝦餃（爸爸愛食）、鳳爪（媽媽至愛）、牛肉球（妹妹favourite)同埋牛肚（我鐘意架），那種懷舊既味道，到而家都仲記得

前幾日在九龍城買餸，經過牛肉檔，買左一個新鮮牛肚，想重拾一下當年的味道，憑著記憶，加d減d，就做左一個沙嗲沙茶牛肚出來，味道還是不錯，差左少少甜味，所以食譜根據味道修正一下。

材料：新鮮牛肚一個（一斤左右）
蔥油材料：蔥段、蒜頭8粒（切片）油3-4湯匙
牛肚醃料：沙茶醬1/2茶匙、沙嗲醬1茶匙、柱侯醬1/2茶匙、甜醬1.5茶匙、糖少許、生抽2茶匙、蠔油一茶匙、蔥油1湯匙、水1-2湯匙
煮牛肚材料：薑2-3片、蔥結一個（或蔥段適量）、紹興酒1瓶蓋、桂皮一塊、八角2粒、月桂葉4-5塊
其他：白蘿白一條（切條）

步驟
1. 把牛肚放室溫水中，加入煮牛肚材料，以中火煮滾，轉中小火煮45分鐘至1小時，直至牛肚變林，取出放涼備用

2. 把已切條的白蘿白加入煮牛肚的水中，煮15-20分鐘至蘿白變林

3. 在另一鍋中加入蔥材料爆香，取出油備用

4. 牛肚放涼後盡量揸干水份，切成條狀

5. 把牛肚醃料放入牛肚，醃最少4小時，過夜更佳。

6. 在小碟中加入白蘿蔔條，放上牛肚，隔水蒸10分鐘即可

這篇文章沙茶沙嗲牛肚最早出現於 Daphne 樂思廚。

牛肚 彙整 - Daphne 樂思廚

麵鋪牛五寶

沙茶沙嗲牛肚

牛肚彙整 - Daphne 樂思廚