泰菜彙整 - Daphne 樂思廚

龍蝦冬陰功湯

dralanlam — Fri, 17 Oct 2025 06:08:01 +0000

幾日前去泰國去幫襯burger and lobster，之前每次都係食龍蝦包，今次佢哋出咗一個新嘅菜式：龍蝦冬陰功湯！抱住試吓無妨嘅心情，點知一飲落去覺得好好味喎馬上返嚟還原一下味道，用上超勁多香草去煮，+1隻原隻嘅龍蝦，將曼谷嘅味道呈現返喺屋企。

材料：香茅10至12支、南薑四至五片、蕃茄三個、芫荽根8至10條、雞湯一公升（我用自製嘅雞湯）、蒜頭8至10粒、蔥頭6-8粒（一開二）、檸檬葉四至五塊、泰國芫荽適量、芫荽適量、蝦殼半斤、龍蝦一隻、車厘茄及草菇（一開二）適量、椰汁300毫升（按喜好加減）、指天椒適量、青檸三至四個（取青檸汁用）

調味料：泰國Chili paste 1.5 湯匙、魚露適量、鹽少許

步驟
1. 香茅取根部位置切片、芫荽根洗乾淨、南薑切片、蕃茄去除外皮後以攪拌器攪成蕃茄汁
2。蕃茄汁過篩備用

3.龍蝦開邊，取出龍蝦膏備用

4.蝦殼白鑊炒香之後取出備用（我今次用氣炸鍋180 度6分鐘）

5. 香茅、南薑、蒜頭及蔥頭放在白鑊中炒香之焦黃色，然後加入芫荽炒入一會，加入已炒香的蝦殼炒一會

6.加入龍蝦膏炒香，然後加入泰式chili paste炒香

7.注入雞湯及蕃茄汁煮滾，然後加入指天椒煮大約15至20分鐘

8. 15至20分鐘後把所有香草取出，然後加入椰汁

9. 加入車厘茄、草菇及龍蝦再煮10分鐘

10.加入撕碎了的泰國芫荽、芫荽及檸檬葉，加入調味料試味至合適為止，最後加入青檸汁

這篇文章龍蝦冬陰功湯最早出現於 Daphne 樂思廚。

自製泰式蝦頭醬

dralanlam — Fri, 03 Oct 2025 07:32:02 +0000

唔知做乜事，呢排香港買唔到好食嗰隻蝦頭醬，與其求其買一個牌子，不如自己試吓整！買來一斤大頭蝦，剪咗個蝦頭攞啲蝦膏出嚟，再加埋少少蝦米同埋一啲香草，半個鐘頭就可以整到惹味同埋新鮮好味嘅蝦頭醬！可以用嚟整泰式炒雜菜

鍾意食泰菜嘅朋友不容錯過！

材料：大頭蝦一斤、香茅一支（取根部位置）、蒜頭兩粒、蔥頭一粒、蝦米一湯匙、油50-80毫升

調味料：胡椒粉少許、糖¼茶匙、魚露適量、紹興酒少許

步驟：
1.大頭蝦買回來後如果不立刻用的話需要放冰格，用時用流水方法解凍，如果新鮮買回來就煮就不需要放冰
格

2.把大頭蝦的頭剪下來，去除沙囊，然後剪開大頭蝦

3.把蝦膏取出

4.蒜頭及蔥頭去皮，香茅取根部位置，全部打碎

5.在平底鍋中加入一半的油，把大頭蝦頭部的殼放進，先爆香4至5分鐘（可能會有彈油嘅情況，需要嘅話加上蓋子）

6. 一直煮直至蝦油從蝦頭殼中冒出，加入少許紹興酒，把蝦殼取出來扔掉

7.蝦米洗乾淨後抹乾，盅碎

8.加入剩餘的油，把香草材料爆香加入盅碎了的蝦米

9.爆香後加入蝦頭糕，以慢火慢慢煮，直至蝦油冒出
10.加入調味料試味即成

煮好之後放喺玻璃容器入邊，可以存放一個星期

俾埋泰式炒雜菜食譜大家，喜歡嘅朋友一齊煮吓啦！

香噴噴泰式炒雜菜

這篇文章自製泰式蝦頭醬最早出現於 Daphne 樂思廚。

泰式香草粉絲蟹煲

dralanlam — Sat, 11 Jan 2025 14:05:58 +0000

六年前喺師傅嘅私房菜食過粉絲蟹煲，之後就冇乜點樣再煮過！今次返曼谷又搵師傅，又整返粉絲蟹煲，師傅話粉絲蟹煲用豬腩肉整更加好味。返到香港之後自己改良咗少少，加上非常新鮮嘅肉蟹去整，一路煮一路覺得好香整完之後試一啖！不得了！粉絲又香又帶蟹膏香味可以係咖喱蟹之後嘅一個signature Dish

材料：大肉蟹一隻、泰式粉絲兩束
香草：芫荽頭4-5根、薑片4-5片、芹菜（按喜好）、蔥少許（切段）、五花腩適量200-300克蒜頭7-8粒、蔥頭5-6粒
醃粉絲材料：豉油1湯匙、魚露1茶匙、椰糖少許、蠔油1湯匙、暖水1湯匙、黃咖喱粉少許、香草paste(以6根莞茜根、4粒蔥頭、四粒蒜頭、0.5茶匙芫茜籽、少許白胡椒盅爛）、油適量
五花腩醃料：蠔油一茶匙、糖少許、生抽半茶匙、魚露少許、黃咖喱粉少許

步驟：
芹菜洗淨切段，菜和莖分開放
五花腩切片後加入醃料醃一會
蒜頭、蔥頭、薑片去皮略拍
粉絲浸軟後略剪，以醃料醃30分鐘（用手均勻拌好！很重要啊）

在鍋中底部，加入五花腩、薑片、蒜頭、莞荽頭

加入蟹身，然後鋪上粉絲再放上蟹蓋

放上蟹蓋後的樣子

加入一湯匙的暖水，然後蓋上蓋子，大火煮滾後轉小火煮18至20分鐘

打開蓋子後以大火收汁即可

P.S 要用比較鎖水的煲子才可以哦！

這篇文章泰式香草粉絲蟹煲最早出現於 Daphne 樂思廚。

香茅魚露香煎雞扒

dralanlam — Thu, 28 Nov 2024 14:20:34 +0000

中午嘅時候想食啲好味嘅雞扒，出街食雞扒好難食到好好味嘅雞扒，都係自己整實際啲新鮮啲！買新鮮嘅雞髀返嚟起自己起骨整最實際！皮煎到脆卜卜，本身打算唔食皮嘅我都忍唔住誘惑，最終成塊食晒！加咗魚露同埋其他香料一齊煮嘅雞扒帶有一啲泰國嘅味道，10分鐘內清碟

材料：新鮮雞髀兩隻（起骨）、香茅兩支（取根部盅扁）、蒜頭三至四粒（拍碎）、蔥頭一至兩粒切片、檸檬葉兩塊、青檸一個（取汁用）

調味料：紹興酒一瓶蓋、魚露三份一茶匙、生抽少許、糖少許、水兩湯匙

步驟
新鮮雞髀買回來後起骨，在雞皮上插上小孔，並在雞肉𠝹上淺刀紋
以1/4茶匙的鹽醃雞扒最少兩小時
加少許油在平底鍋中，把雞扒放進，皮向下，以中火煎香雞皮，需時約5分鐘不要反轉來反轉去，在雞皮煎了3分鐘後，加入拍扁了的香茅，一起爆香

雞扒的皮酥脆口反轉雞扒，把香茅放在雞皮上，以中小火先煎4至5分鐘，然後加入蒜頭及蔥頭一起爆香

加入紹興酒及其他調味料

試味直至合適後，撕碎檸檬葉，然後加入青檸汁即可

這篇文章香茅魚露香煎雞扒最早出現於 Daphne 樂思廚。

泰式蛋沙律

dralanlam — Sun, 21 Jul 2024 15:01:02 +0000

泰國人食飯喜歡將頭盤、湯、沙律等等放喺同一張枱，一時食吓沙律、一時食吓咖喱，一時食吓小食，亦都會將沙律同埋飯一齊食！所以泰式嘅沙律除咗甜味之外仲有酸味同鹹味，可以送飯一齊食

今次就同大家整一個屋企一定有嘅材料！雞蛋！泰式雞蛋沙律，半煎炸嘅蛋加上新鮮嘅香草，甜甜酸酸嘅味道非常開胃！適合夏天食

材料：雞蛋兩隻、蔥兩棵（只用青蔥部份）、中式芫荽一棵、泰國芫荽一棵、檸檬葉兩片、薄荷葉六至八塊、魚露數滴、蔥頭一個、香茅兩條

醬汁材料：青檸半個、白糖一茶匙、魚露一茶匙、辣椒粉適量、炒米粉半茶匙

步驟
1. 把芫荽、泰國芫荽、青蔥切段
2. 薄荷葉切碎

3. 紅蔥頭切片、
4. 香茅取根部切片

4. 檸檬葉切絲

5. 香茅取根部切片

6. 雞蛋打發後加入掃滴魚露攪拌勻循備用

7. 把一湯匙的油加在炒鑊中，直至燒熱，加入雞蛋煎香兩邊後取出

8. 用鑊鏟切碎

9. 然後加入醬汁材料拌勻試味至合適
10. 加入香草材料拌勻即可

這篇文章泰式蛋沙律最早出現於 Daphne 樂思廚。

打拋豬肉飯

dralanlam — Sat, 20 Jul 2024 16:24:28 +0000

打拋其實係咩嚟呢？佢就係泰國嘅其中一款basil，英文名是holy basil，泰文名是甲拋，打拋豬肉其實就係holy basil 炒豬肉。泰國人鍾意用嚟配飯，加埋荷包蛋簡簡單單又一餐！而香港人呢，就用嚟整生菜包，一樣咁好食！

坊間有好多打拋醬，其實唔需要用都得，因為材料實在太簡單，大家屋企應該都會有嘅！我哋就一齊睇吓點樣整啦

二人份材料：新鮮豬肉140克、holy basil 適量、蒜頭兩粒指天椒一至兩條

醬汁材料：糖半茶匙、魚露半茶匙、蠔油兩湯匙、老抽半茶茶、水三湯匙

步驟
1. 新鮮豬肉買回來後洗淨抹乾，然後剁碎
2. 在小碗中拌勻醬汁材料

3. 在炒鑊中加入兩湯匙的油，燒熱後加入拍扁了的蒜頭及指天椒炒香

4. 加入豬肉炒香，直至八成熟

八成熟嘅樣，大部份變咗白色仲有少少紅色

5. 把醬汁加入豬肉中攪拌勻，直至收汁，加入holy basil 炒一會兒即可

按照自己喜好加入適量嘅葉就可以啦

6. 把打拋豬肉放在飯側邊，在飯上面加上荷包蛋，美味可口嘅打拋豬肉飯就整好啦

這篇文章打拋豬肉飯最早出現於 Daphne 樂思廚。

金不換三杯雞

dralanlam — Tue, 16 Jul 2024 15:49:20 +0000

泰國叫做金不換、越南台灣叫做九層塔，呢款香草確實係好香嘅！無論用嚟炒花甲、放落去咖喱或者用嚟炒雞都可以提升香氣。今日就用佢嚟做三杯雞！

加咗勁多香料嘅金不換三杯雞香氣撲鼻、食落去少少香嘅味道，香草嘅味道同埋濃郁嘅泰式風味。今次加多咗麻油落去煮，比起之前嘅味道更加香，係邪惡少少，間唔中食邪惡少少OK啦

材料：新鮮雞半隻
香草材料：蒜頭三粒（略拍）、蔥頭兩至三粒（一粒切開四件）、紫洋蔥半個（切件）、蔥段適量、薑片三片

調味料：麻油一湯匙、紹興酒兩湯匙、生抽三湯匙、水少許

雞肉醃料：生抽一茶匙、鹽一茶匙、糖1/3茶匙、魚露少許、蠔油少許

步驟：
1. 新鮮雞斬件後以調味料中的鹽先醃最少15分鐘，然後加入其他調味料醃最少1小時
2. 在炒鍋中先爆香蒜頭、蔥頭、薑片及蔥白，加入雞件爆香

3. 然後調味料中的紹興酒炒一會再加入其他調味料

4. 最後加入青蔥段及金不換略炒直至收汁即可

這篇文章金不換三杯雞最早出現於 Daphne 樂思廚。

泰式香茅大蝦粉絲煲

dralanlam — Tue, 09 Jul 2024 01:36:51 +0000

大蝦粉絲煲！經典嘅泰國菜式，大家都喜歡！今次用上香茅同埋檸檬葉嚟整，為平凡嘅大蝦粉絲煲加上一啲啲特別，快啲睇吓食譜啦。

材料：粉絲一個、海蝦6隻（去除蝦囊及蝦腸）香茅三至四條（取根部位置拍扁）、檸檬葉4-5塊（撕碎）、蔥頭兩至三粒（一開四）、蒜頭六至八粒（略略拍扁）、芫荽根五至六條（略略拍扁）、芫荽籽一茶匙、蔥段適量、姜三至四片

粉絲調味料：蠔油兩湯匙、生抽1.5 茶匙、糖1/3茶匙、魚露少許、泰國黑豉油少許、生油一湯匙

海蝦調味料：紹興酒一瓶蓋、美極鮮醬油少許、糖少許

步驟：
1. 泰國粉絲以室溫水浸15分鐘，然後把其剪開，加入粉絲調味料醃10分鐘
2. 在鑄鐵鍋中加入薑、白色的蔥段、芫荽籽及黑椒炒香
3. 加入海蝦煎香，加入紹興酒一瓶蓋及其他海蝦調味料，盛起海蝦備用

4. 再同一個炒鍋中加入粉絲及青蔥段，注入30-50毫升的水煮滾後蓋上蓋子，煮4-5分鐘
5. 5分鐘後加入海蝦及芫荽拌勻後加入檸檬葉，煮1分鐘，直至收汁即可

用上鑄鐵鍋來煮，保溫又美觀

這篇文章泰式香茅大蝦粉絲煲最早出現於 Daphne 樂思廚。

自製椰漿紅咖喱雞

dralanlam — Fri, 21 Jun 2024 11:37:14 +0000

上次去清邁學藝之後，一直都想試吓喺屋企自己整椰漿，然後製作紅咖喱，但忙住玩同埋做嘢嘅我，上個禮拜一直都冇時間，琴日喺日本返嚟之後，今朝一早起身馬上行動！

用新鮮椰漿做嘅紅咖喱，比起用盒裝做出嚟嘅紅咖喱更易煮出靚靚嘅椰油、椰味更加香濃，如果買唔到椰漿，但係屋企有攪拌機，不妨試一試，而且一個椰子，椰汁可以用嚟整雞湯、椰子肉可以用嚟整椰漿同埋椰絲，一個多用$35買一個返嚟玩吓，超級抵

另外，俾少少冷知識大家，喺超級市場或者泰國買到一盒盒嗰啲，我哋全部當佢係椰漿，質地比較杰，用嚟煮泰菜嘅時候比較容易煮出椰油，但係就比較肥同埋膩。咖喱嘅時候其實係要加一啲椰奶，椰奶就係椰漿加水，如果買盒裝嘅椰漿就需要加水，水嘅份量係一比一，椰奶可以令到咖喱帶有椰香味但係冇咁膩，自家製製作嘅話就睇吓食譜啦！

紅咖喱材料：椰漿1000 ml、紅咖喱兩湯匙、雞扒兩至三件（去皮後切件以少許鹽醃一會兒）、香茅五至六支（取根部切段）、檸檬葉幾塊、南薑三至四片、芫荽根5-6條（拍扁）、蝦醬三份一茶匙、椰糖一茶匙、魚露適量、指天椒數片（可省）、泰國茄子三至四個（切開後灼熟）

咖喱面料：芫荽適量、檸檬葉適量

椰漿材料：新鮮椰子一個、水400 ml
椰奶材料：已攪拌的椰肉、水800 ml

製作椰漿步驟
1. 在街市買椰子請檔主分開椰汁及椰子
2. 回家後，用小刀把椰子皮削去，把椰子切成小塊

3. 把椰子放在攪拌機中，加入400毫升的水以高速攪拌5至8分鐘，過濾後即成椰漿

製作椰奶步驟
1. 製作椰漿的椰子渣滓，放入攪拌機中加入800毫升的水，以高速攪拌5至8分鐘，過濾後即成椰奶

製作椰絲
1. 打椰子渣滓放在焗盤上，以低溫150度焗1小時左右，中途要反轉數次，即成椰絲

製作紅咖喱
1. 在炒鑊中加入適量的油，先爆香紅咖喱醬

2. 然後逐少加入椰漿（大約加入300毫升就好了）直至紅咖喱起油

3. 加入香草材料炒勻，然後加入雞件、蝦醬及椰糖及魚露煮2至3分鐘

4. 加入椰奶200毫升左右，煮至雞肉熟透試味，然後加入茄子

5. 加入咖喱面料，然後加入椰絲即可

這篇文章自製椰漿紅咖喱雞最早出現於 Daphne 樂思廚。

泰北豬肉串燒

dralanlam — Fri, 14 Jun 2024 12:36:23 +0000

上星期到清邁旅行，除咗旅行之外其實都係去學師！今次又去咗上次Miss屋企嗰度整嘢食，朋友們想學豬肉串燒，我心諗：「豬肉串燒我自己都整過好多次，既然朋友想學就睇吓Miss點樣整啦！」，各處鄉村各處麗，泰北嘅豬肉串燒同曼谷嘅串燒有啲唔一樣，無論係醃料、煮法、醬汁都有啲唔同，今次加咗自己嘅一啲心得落去泰北呢個豬肉串燒嗰，實行一個曼谷泰北fusion！整出嚟嘅豬肉串燒又香又Juicy，醬汁材料亦都簡化咗唔少！大家快啲睇吓點樣整啦！

材料：梅頭豬肉半斤
醃料：芫荽根兩條、蒜頭兩粒、黑胡椒碎¼茶匙、椰汁兩湯匙、生抽1茶匙、魚露少許、蠔油一茶匙、糖1/4茶匙、黃薑粉¼茶匙、masala curry powder 1/4 茶匙
沙嗲醬材料：椰汁三湯匙、紅咖喱醬一茶匙、五香粉1/4茶匙、花生碎適量、椰糖一茶匙、羅望子醬1/2茶匙、魚露少許、一半的醃肉汁

其他：竹籤適量

步驟：
1. 梅頭豬肉洗乾淨後抹乾水，切成薄片
2. 醃料中的芫荽根、蒜頭以石盅盅碎

3. 然後加入豬肉，加入其他醃料，醃最少15分鐘
4. 醃好的豬肉穿在竹籤上，每支竹籤4至5件豬肉

5. 串燒可以放在炭爐中燒熟，或者以氣炸鍋炸熟，氣炸鍋的話可以用180度氣炸2分鐘後，掃上醃肉汁，然後再加2分鐘再掃上醃肉汁，總共煮6分鐘即可

6. 使用炭爐的話，在反轉串燒的時候需要掃上醃肉汁，這樣就可以保持肉汁

7. 製作醬汁：把所有材料煮滾後試味即可

這篇文章泰北豬肉串燒最早出現於 Daphne 樂思廚。

泰菜 彙整 - Daphne 樂思廚