星期五就係中秋節呀，大家有冇諗定同屋企人去邊度食飯呢？定係喺屋企煮餐好嘅比屋企人食？我自己喜歡喺屋企煮飯，因為可以選擇好嘅材料，加上唔落味精，食得放心健康啲。
做節就梗係要煲啲靚湯飲，澳洲嘅翡翠青邊鮑魚出名清甜乾淨，加上黃花膠同埋竹絲雞去煲湯，秋天嘅時候飲清潤又好味！煲完湯之後嘅鮑魚仲可以拎返出嚟切片放落生菜嗰度，一煲兩食！抵呀！
材料：澳洲急凍青邊鮑魚五隻、豬展半斤、竹絲雞一隻（起皮切件）、瑤柱兩至四粒、已浸發黃花膠4隻（切大件）、馬蹄9至10粒、百合30克、無花果三至四粒、蜜棗一粒、杞子10克、水4.5公升
步驟：
青邊鮑魚放喺雪櫃解凍一晚，取出後用牙刷刷洗，剪去鮑魚嘴，然後放在滾水中飛水20秒後取出再洗淨
肉類洗乾淨後切件放在室溫水中煲滾，然後取出洗乾淨備用
在湯煲中加入4.5公升的水，把豬展、竹絲雞、鮑魚、馬蹄、無花果及蜜棗放進，大火煮滾，然後以小火煮45分鐘
把澳洲鮑魚及百合放在湯中，小火煲45分鐘
然後加入黃花膠小火煲20分鐘後取出花膠
把火調校到最大，讓湯滾起10分鐘，然後加入杞子再滾2至3分鐘
加入適量的鹽即可
把鮑魚從湯中取出，放涼後切薄片，然後放在灼了的生菜上
取出一湯殼的湯，然後加入一茶匙的杞子煮2分鐘，加入生粉水即成芡汁
把芡汁放在鮑魚生菜上即可