小時候家住油麻地舊區,附近有一家歷史悠久的茶樓-得如酒樓,當年間唔中會同家人幫襯。還記得樓下有3部入2蚊就可以玩既搖搖船,仲有一個入1蚊可以磅重既橙色磅重計。
拾級而上,就去到貼左紙皮地既酒樓。爸爸話:「以前d人會帶埋雀仔飲茶架!」,但細個幫襯時,已經無雀仔啦!
去到酒樓,一定會點以下既點心:蝦餃(爸爸愛食)、鳳爪(媽媽至愛)、牛肉球(妹妹favourite)同埋牛肚(我鐘意架),那種懷舊既味道,到而家都仲記得😊
前幾日在九龍城買餸,經過牛肉檔,買左一個新鮮牛肚,想重拾一下當年的味道,憑著記憶,加d減d,就做左一個沙嗲沙茶牛肚出來,味道還是不錯,差左少少甜味,所以食譜根據味道修正一下。
蔥油材料:蔥段、蒜頭8粒(切片)油3-4湯匙
牛肚醃料:沙茶醬1/2茶匙、沙嗲醬1茶匙、柱侯醬1/2茶匙、甜醬1.5茶匙、糖少許、生抽2茶匙、蠔油一茶匙、蔥油1湯匙、水1-2湯匙
煮牛肚材料:薑2-3片、蔥結一個(或蔥段適量)、紹興酒1瓶蓋、桂皮一塊、八角2粒、月桂葉4-5塊
其他:白蘿白一條(切條)
1. 把牛肚放室溫水中,加入煮牛肚材料,以中火煮滾,轉中小火煮45分鐘至1小時,直至牛肚變林,取出放涼備用